Naturfarar i bygge- og eigedomssaker
Etter plan- og bygningslova § 28-1 kan grunn berre byggast ut eller eigedom opprettast eller endrast dersom det er tilstrekkeleg tryggleik mot fare eller vesentleg ulempe som følgje av natur- eller miljøforhold. Det same gjeld for grunn som blir utsett for fare eller vesentleg ulempe som følgje av tiltak.
Tilstrekkeleg tryggleik er nærare presisert i byggteknisk forskrift (TEK17) kapittel 7, der det vert skild mellom ulike naturfarar og ulike typar byggverk.
Krav til trygg byggegrunn gjeld også for tiltak som ikkje er søknadspliktige. Før du sender inn ein søknad eller set i gang eit byggjetiltak, må du sjekke om byggegrunnen er trygg.
Det finst aktsemdskart og farekart som viser område med potensiell eller kartlagt naturfare. Naturfare kan vere:
- Jord- og flaumskred
- Snøskred
- Steinsprang
- Flaum/stormflo
- Marin leire og kvikkleire
Du kan bruke NVE Atlas for å undersøkje aktuell naturfare på eigedomen din.
Dokumentasjon på tryggleik mot naturfarar skal sendast inn i byggje- og eigedomssaker, med unntak for saker som berre gjeld:
- Fasadeendringar
- Oppføring, endring og reparasjon av bygningstekniske anlegg
- Bygningsmessige endringar av teknisk karakter, som til dømes endring av brannskille, etablering av våtrom eller rehabilitering av pipe
- Bruksendring og samanslåing av bueiningar
Dersom tryggleiken mot naturfarar allereie er avklart i ein plan, er det tilstrekkeleg å vise til denne og følgje dei krava som er sett. Derimot, dersom tryggleik ikkje er avklart, må det undersøkast om tiltaket ligg i ei kjent faresone eller aktsemdsområde for ein eller fleire naturfarar.
Dersom tiltaket ligg i ei faresone, eller området ikkje er kartlagt og det er grunn til å vurdere naturfare, må ein fagkyndig gjere ei utgreiing. Fagkyndig vurdering skal inkludere:
- Informasjon om kven som er den fagkyndige
- Kva tiltak som er vurderte, og kva naturfarar som er undersøkte
- Konklusjon om tiltaket har tilstrekkeleg tryggleik mot naturfarar
- Om det er behov for kompenserande tiltak, og kort beskriving av vurderingsmetode og datagrunnlag
Ein fagkyndig må ha den nødvendige kompetansen til å gjere forsvarlege vurderingar. Kompetansekrava varierer etter type naturfare og er omtala i NVEs rettleiingar, som kan finnast på NVEs heimesider.
Dersom dokumentasjonen frå fagkyndig viser tilstrekkeleg tryggleik utan kompenserande tiltak, kan kommunen gi løyve, forutsatt at alle andre krav i plan- og bygningslova er oppfylte.
Dersom tryggleik avheng av sikringstiltak, må desse prosjekterast og innarbeidast i tiltaket. Om dokumentasjonen ikkje viser tilstrekkeleg tryggleik, eller dersom den nødvendige dokumentasjonen ikkje blir levert, vil kommunen måtte avslå søknaden.
Ved kunnskap om utrygg grunn kan kommunen legge ned eit bygge- og deleforbod.
For meir informasjon, sjå: