Fritidskassa

Økonomisk støtte gjennom fritidskassa er behovsprøvd. Det betyr at ordninga ikkje er for alle, men for dei barna/familiane som treng hjelp til å betala for aktiviteten til barna.

Økonomisk støtte gjennom fritidskassa er ikkje ein rett, men eit tilbod for at alle barn kan delta i éin organisert fritidsaktivitet uavhengig av foreldra si inntekt og livssituasjon. 

Fritidskassa kan brukast til utgifter knytt til éin fast, organisert fritidsaktivitet. Det betyr at den kan brukast til å betala til dømes medlemskontingentar, treningsavgifter, deltakaravgifter, utstyr og eigenandel til cup/stemne/leir.  Fritidskassa gjeld ikkje for deltaking i kulturskulen.

Om du meiner at barnet ditt treng økonomisk støtte til deltakaravgift kan du senda ein førespurnad til oss gjennom skjemaet nedanfor. I skjemaet må du svara på nokre spørsmål om kva du treng økonomisk støtte til, kor mykje økonomisk støtte du treng for at barnet kan delta i aktiviteten, og kvifor du treng støtta.

Søknadsskjema

Kommunen vil handsama søknaden så raskt som råd og leggja til innvilga beløp på fritidskassekortet til barnet. 

Dersom søknaden om støtte blir innvilga, må forelder/ føresett med same bustadadresse som barnet oppretta ein brukar i Aktiv fritid (lenke under). 

etne.aktiv-fritid.no

Klikk på "Ny bruker", og opprett ein brukar. 
Barn over 13 år som har moglegheit til å logga inn med ID-porten, kan oppretta brukar sjølv.  

Klikk på "Ny bruker", og opprett ein brukar. Brukar er som oftast den føresette. Det er e-postadressa di som blir brukarnamn. Mottar du ikkje aktiveringskoden på e-post, sjekk søppelposten. 

Dersom du er over 13 år og har moglegheit til å logge inn med ID-porten, kan du gjera dette sjølv. Dersom du er under 13 må ein forelder/føresett med lik bustadadresse som deg gjera det.

Du kan bruka fritidskassa til å betala fakturaer for medlemskontigent, utstyr, eigenandel til eksempelvis cup, stemne. Når fakturaen[e] kjem, legg de inn kontonummer og evt. KID og det innvilga beløpet. 

Dersom du alt har betalt faktura for, så kan du få refusjon for innviga beløp. Registrer kontonummer utbetalinga skal gå til, og hugs å legge ved kvittering for betalt beløp. Dersom det skal leggast ved meir enn eit vedlegg, må du hugse å markera alle vedlegg/filer i filvelgaren samtidig. 

Fritidskassa finnes fordi barn har rett til å delta i fritidsaktivitet. Det er både politikarar, kommune og det frivillige organisasjonslivet einige om. Det er årsaka til at Fritidserklæringa | Bufdir vart laga.

Fritidskassa er ein del av arbeidet med å nå måla i Fritidserklæringen. Økonomi kan vere ein barriere for at barn deltek i organiserte fritidsaktivitetar. Fritidskassa skal gje dei barna og familiane som treng økonomisk støtte for å kunne delta i éin organisert fritidsaktivitet den økonomiske hjelpa dei treng for å kunne delta i aktiviteten på lik line med andre barn. 

For å kunne sørga for at alle i riktig målgruppe får tilgang til sitt Fritidskort, får bruka det slik målet med prosjektet er, og at berre dei sjølv og/eller deira føresette får moglegheit til å styra bruken av barnets Fritidskassa, må me samla inn og lagra nokre personopplysningar. Personopplysningane me nyttar er namn, bustadadresse, fødselsnummer, kontaktinformasjon, saldo og historikk på det aktuelle Fritidskassa og i nokre tilfelle kontonummer. Når ein betalar faktura med fritidskortet, kan me også ta kontakt med laget/organisasjonen for å få stadfesta at barnet er betalt medlem i laget/organisasjonen.

Dette gjeld berre for dei som vel å registrera seg i den nye digitale plattforma og ta i bruk sitt/sine barns Fritidskassa - me hentar ikkje opplysningar om andre frå målgruppa før familien sjølv aktivt registrerer seg og godtek vilkåra for handsaming av personopplysningar.  

Ein organisert aktivitet skal vera planlagt med eit program, ha ein leiar som styrer aktiviteten og ha minimum 6 treffpunkt i halvåret.