Beredskap og tryggleik i Etne kommune

Kriseleiinga skal sikra at kommunen samla yt ein effektiv innsats i samband med ekstraordinære hendingar. For å løysa desse oppgåvene skal leiinga setja opp og halda oppe eitt overblikk over situasjonen, koordinera handlingar og disponera ressursar og dessutan koordinera den interne og eksterne kommunikasjonen til kommunen om hendinga.

Kven er med i kriseleiinga i Etne kommune?

• Kommunedirektør
• Kommunalsjef for helse og omsorg
• Kommunalsjef for oppvekst og kultur
• Kommunalsjef for utvikling og drift
• Ordførar
• Varaordførar
• Beredskapskoordinator
• Fagansvarleg Media og kommunikasjon
• Avhengig av situasjonen kan kriseleiinga supplerast med:
  • Politi
  • Sokneprest
  • Kommuneoverlege
  • Brannsjef
  • Einingsleiarar

Kriseleiinga kan kalla inn andre representantar dersom hending og lokal situasjon skulle tilseia det.

Kva oppgåver har kriseleiinga?

• Innhenta opplysningar om situasjonen i kommunen.
• Sette i gang tiltak for å hindra/ redusera skadar på personar, miljø og materielle verdiar.
• Prioritera ressursar frå kommunen si side.
• Halda kontakt med LRS (lokal redningssentral), eventuelt skadestadsleiinga, dersom ikkje LRS (lokal redningssentral) er etablert.
• Utarbeida og senda ut informasjon til innbyggjarar og media.
• Gi rapport om situasjonen i kommunen til Statsforvaltaren.

Når kan kriseleiing etablerast?

Ved ei ulykke eller katastrofe kan kommunedirektøren, eller den som blir delegert, vedta at kommunal kriseleiing skal etablerast.

Etne kommune har det generelle ansvaret for tryggleiken til innbyggjarane.

Etne kommune skal vera ein trygg og sikker kommune. Me skal førebyggja hendingar og vera godt førebudd for å takla hendingar som likevel måtte oppstå. Beredskapsarbeidet til kommunen skal vera heilskapleg og systematisk. Me søkjer samarbeid med andre der det er mogleg og systematiserer arbeidet for å få eit best mogleg resultat. Dette blir koordinert av beredskapsleiaren. Ved hendingar skal kommunen vera i stand til raskt å setja i verk tiltak som er nødvendige for å verna befolkninga og raskast mogleg bringe kommunen tilbake til ein normalsituasjon.

Kommunen sine oppgåver er

Kommunen sitt ansvar i ein beredskapssituasjon er å delta i arbeidet med skadeavgrensande tiltak for å sikra menneske, miljø og økonomiske verdiar. Det kan også vera situasjonar der kommunen sjølv er ansvarleg for å handtera hendingar.

I dei fleste tilfelle vil hendingar ikkje vera av større omfang enn at redningstenesta vil ha kapasitet til å takla situasjonen. Redningstenesta er leia av politiet og omfattar brannvesenet, helsetenesta, industrivernet, forsvaret, heimevernet m m.

Dersom det skjer ein omfattande katastrofe eller ulykke og dei ordinære innsatsorgana sine ressursar ikkje strekk til, kan kommunen bli engasjert i rednings- og oppryddingsaksjonar. I slike situasjonar vil det bli stilt store krav til kommunen, også utover det å stilla ressursar til disposisjon.

Beredskapsplanen er ein viktig reiskap for at kommunen skal kunna reagera raskt og effektivt i kritiske situasjonar. Beredskapsplanen til kommunen vart godkjend av kommunestyret.

Ved kriser og ulykker er det viktig at du har tilgang på offisiell informasjon om kva som skjer og kva du bør gjera.

• Nettsidene til Etne kommune vil ha korrekt informasjon til befolkninga ved kriser og ulykker.
• Nødvarsel er ei teneste frå norske styresmakter. Du blir varsla på mobiltelefonen din om det oppstår ei akutt hending med fare for liv og helse. Les meir om nødvarsel her.
• Beredskapskanalen NRK P1 NRK har ansvar for å senda beredskapsmeldingane til styresmaktene og viktig informasjon på radio. 
• Sørg for at mobiltelefonen din er oppdatert, og at du har radio tilgjengeleg DSB (Direktoratet for tryggleik og beredskap) tilrår alle husstandar å ha DAB-radio tilgjengeleg.

Direktoratet for samfunnstryggleik og beredskap (DSB) tilrår at flest mogleg er førebudde på å klara seg sjølv i ei veke i ei krise. Dei grunnleggjande behova som må dekkjast den første veka av ei krise er varme, drikke, mat, legemiddel, hygiene og informasjon.

Mange av oss har allereie ein god del av det me treng for å klara oss sjølv i nokre dagar, så det er ofte ikkje så mykje som skal til for å komma heilt i mål.

Les meir om eigenberedskap her