Gjenbruk av dei gamle tennisbanane
Dei nye tennisbanane ved Skakke er etter planen klare for bruk til hausten. Kommunen er blitt kontakta av ei gruppe som ønskjer å gjenbruka dei gamle tennisbanane ved Etne stadion til ein fast installasjon for isbane.
- Ein enkel, trygg og tilgjengeleg isbane som kan takast i bruk så snart vêrtilhøva tillet det, heiter det i prosjektskissa. Initiativtakarane ser for seg at den eine banen blir aktivitetsområde tilpassa for skøyting, hockey/bandy om vinteren og til dømes basket, eller andre ballspel om sommaren. Den andre banen blir leikeområde med faste element som kan brukast både med og utan is (t.d. balansebommar, klatreapparat).
Dei gamle tennisbanane har ei attraktiv plassering i Kulturaksen, og arealet er regulert til idrett. Dispensasjon til annan aktivitet kan vurderast etter søknad. Før kommunen eventuelt inngår avtale om å leiga ut arealet til isbane, ønskjer me å høyra om her er andre grupper og organisasjonar som er interesserte i å bruka dette arealet til idrett og fysiske fritidsformål. Då vil me vurdera dei ulike initiativa før avtale/avtalar blir inngått. Dersom ein går vidare med ideen om å laga isbane her, ønskjer både kommunen og initiativgruppa bak isbanen samarbeid med andre som kan fylla arealet med aktivitetar i månadane utan isdekke.
Innspel, idéar og konkrete ønske må meldast til post@etne.kommune.no seinast 15. august. For utfyllande informasjon kontakt liv.kari.bodtker@etne.kommune.no tlf 415 49 252.
Gamle tennisbananeProsjektskisse frå initiativgruppa til korleis dei gamle tennisbanane kan gjenbrukast.